Vinayaka Chaturthi | Vinayaka Chavithi | Ganesh ji ka tyohaar

Ganesh Chaturthi Vinayagar Chaturthi The Festival Of Lord Ganesh

Vinayaka Chaturthi

India mein Vinayaka Chaturthi Diwali, Holi aur Durga Puja ki tarah sabse zyada celebrate kiye jaane wale festivals mein se ek hain. Vinayaka Chaturthi, Hinduon ke bhagwan Ganesh ji ke jamadin ke mauke pe manaya jaata hai. Vinayaka Chaturthi normally das se gyarah dino ke liye celebrate kiya jaata hai aur is festival ka scale aur popularity pichle kuch decades mein kaafi tezi se badha hai. Vinayaka Chaturthi ke aakhri din pe Ganesh ji ki murtiyon ko paani mein dubaya jata hai – jaise ki ponds, rivers aur seas mein. Is ritual ko Ganesh ji ka visarjan kehte hain. Pichle saal sirf Mumbai mein takreeban 2 lakh Ganesh ji ki murtiyon ka visarjan kiya gaya tha. Is example se aapko Vinayaka Chaturthi ke scale ka idea to lag hi gaya hoga. Mumbai mein Vinayaka Chaturthi ke samay kaafi saare bade bade pandal lagte hain. Aur inme se kuch aise bhi pandal hain jahan visitors se almost daily basis pe 1 crore rupayon tak donational collect kee jaati hain.

India mein Vinayaka Chaturthi ke sabse bade scale ke celebrations usually Western aur Southern states mein hote hain, specifically Maharashtra mein. In states mein Vinayaka Chaturthi ek community festival ki tarah celebrate kiya jata hai jahan societies aur families ek hi Ganesh ji ki murti ki sthapna karte hain. India ke baaki rajyon mein Vinayaka Chaturthi usually family level pe hi manaya jaata hai jahan pe log apne gharon mein hi Ganesh ji ki puja karte hain.

Ganesh Murti at home

Vinayaka Chaturthi ke rangeen celebrations ko media mein bhi kaafi coverage diya gaya hai – Bollywood movies se leke Hollywood movies aur television series tak is festival ko cover kar chuke hain. Bollywood mein common culture ye hai ki har saal Vinayaka Chaturthi ke time release hone wali movies mein Ganesh ji ka ek na ek gaana to zaroor hota hai. Hollywood movies aur television serials mein usually Vinayaka Chaturthi aur Ganpati Visarjan ke celebrations ka footage dikhaya jaata hai. Wo is footage ko usually India ke culture ko represent karne ke liye dikhate hain.

Vinayaka Chaturthi aaj bohot bada festival ban chukka hai. Lekin ye hamesha se aisa large scale festival nahi tha jaisa ki ye aaj hai. Ye festival pichle decades mein kaafi evolve aur grow hua hai aur aaj bhi iski popularity grow hi ho rahi hai.

Vinayaka Chaturthi | Vinayaka Chavithi | Ganesh ji ka janamdin

Vinayaka Chaturthi ka pehla din Hindu calendar ke hisaab se, Bhadra mahine ne Shukla Chaturthi ke din manaya jaata hai. Shukla Chaturthi har mahine aane wale chaand ke waxing period ke chouthe din ko diya gaya naam hai. Vinayaka Chaturthi ke is pehle din pe bhakt Ganesh ji ki murti ko apne ghar ya pandal mein leke aate hai aur wahan Avahana aur Pratishthapana naam ke rituals se us murti hi stapana ki jaati hai. Bhakton ka ye maan na hai ki in pujaon se Ganesh ji ki murti mein Ganesh ji ki spirit aa jaati hai aur in vidhiyon ke baad hi us murti ki puja ki jaa sakti hai. Is sthapana ke baad Ganesh ji ki puja 14 alag alag mantron se ki jaati hai. Ye 14 mantra aur rituals usually daily basis pe repeat kari jaati hain.

Artist painting ganesh idol for ganesh chaturthi celebration

Image Source: Wikipedia

Vinayaka Chaturthi ke festival ka anth dus ya gyarah dino ke baad Ganpati Visarjan ke ritual se hota hai. Is maamle mein Vinayaka Chaturthi baaki festivals se kaafi alag hai kyunki alag alag log alag alag dino pe is festival ka anth Ganpati Visarjan karke manate hain. Bade pandals usually Ganpati Visarjan dusve ya gyarahve din pe karte hain depending on kaunsa din Anant Chaturdashi ke saath conincide hota hai. Lekin families aur chote groups kai baar, Ganpati Visarjan ko Vinayaka Chaturthi start hone ke baad ek, teen, paanch ya saat dino ke baad hi kar dete hain.

Ek note karne wali baat ye hai ki saare Hindu Ganesh ji ko ‘God of all beginnings’ yaani ‘Prathameshwar’ maante hain. Aur Ganesh ji ka ye reputation is cheez mein bhi dikhta hai ki Vinayaka Chaturthi Hinduon ke festive season ki shuruwat mark karta hai. Vinayaka Chaturthi ke baad kaafi saare popular festivals jaise ki Durga Puja / Dussehra, Diwali aur Karva Chauth ek ke baad ek celebrate kiye jaate hain.

Vinayaka Chaturthi | Vinayaka Chavithi | Community level pe celebrate kiye jaane wala tyohaar

Vinayaka Chaturthi ke historical origins ka proof kaafi limited hai to experts ye nahi jaante ki is festival ko kis time se manaya jaa raha hai. Lekin itna evidence zaroor hai ki Vinayaka Chaturthi Satavahana dynasty ke rule ke time se India ke Deccan region mein manaya jaa raha tha. Ye period 271 BC se 30 BC ke beech mein estimate kiya gaya hain. Maharahstra mein, jahan aaj Vinayaka Chaturthi ke sabse bade scale pe celebrations dekhe jaate hain, wahan is festival ka celebration 1630 aur 1680 AD ke beech mein hone ka evidence bhi experts ko mila hai. Us time Maharashtra region pe Maratha empire ko belong karne wale Chhatrapati Shivaji Maharaj rule karte the aur Vinayaka Chaturthi ko ek family festival ki tarah manaya jaata tha.

Chatrapati Shivaji Maharaj

Chatrapati Shivaji Maharaj

Is period ke baad, Maharashtra pe Peshwa dynasty ka rule tha. Peshwas Pune mein based the aur wo Ganesh ji ko apna kuladevata maante the. Aur isi kaaran unke rajya ke time pe Vinayaka Chaturthi state level pe celebrate kiya jaane laga. Lekin, jaise jaise 19th century ke pehle bhaag mein Peshwaon ka apne rajya se grip choota, Vinayaka Chaturthi ek baar fir se ek family festival banke reh gaya.

Iske baad British logon ne India ko invade kar liya aur is kaaran mid-19th century ke around India ke zyadatar hisse British rulers ke rajya ke andar aa gaye. Is phase mein India ke independence leaders ne Vinayaka Chaturthi ko ek baar fir bade scale pe start karke, is festival ko British Rajya ke against ek weapon yaani ek astra ki tarah istemaal kiya.

Join us on Whatsapp

and get free images of Ganesh, Shiva, Durga, Krishna and other gods weekly.

Vinayaka Chaturthi | Vinayaka Chavithi | India ke swatantrata ki ladayi ka ek unique hathiyar

Bal Gangadhar Tilak India ke sabse lok priya freedom fighters mein se ek the. Unko Lokmanya Tilak ke naam se bhi jaana jata hai. Wo late 19th century aur early 20th century ke samay active the. Tilak qualification se ek lawyer, lekin unhone apna career change kiya aur journalist yaani ek patrakaar ban gaye. 1881 mein unhone Marathi newspaper Kesari ki sthapana ki aur wo Kesari ke saath saath Mahratta namak ek angrezi newspaper bhi chalate the.

Bal Gangadhar Tilak

Bal Gangadhar Tilak

Tilak in dono newspapers ko India ke freedom struggle se related khabar logon tak pahuchane ke liye aur freedom struggle join karne ki khatir logon ko inspire karne ke lye istemaal karte the. 1893 mein, Tilak ne ek chote scale pe organize kiye gaye Vinayaka Chaturthi celebrations mein participate kiya. In celebrations ko ek community festival ki tarah celebrate kiya jaa raha tha jahan us local society ke har level ka insaan involved tha bina kisi casteism aur difference ke. Ye dekh ke Tilak ne realize kiya ki Vinayaka Chaturthi logon ka kaafi pasandida festival tha aur is festival ko celebrate karte hue log casteism ka bare mein nahi sochte the. Is experience se TIlak ko ye idea aaya ki Vinayaka Chaturthi ko istemaal karke wo India ke logon ko ek group mein ikatthha kar sakte the aur iske dwara wo Britishers ke against act karte the.

Is idea ko pursue karte hue Tilak Vinayaka Chaturthi ko apne newspapers ke through popularize karne lage. Wo Vinayaka Chaturthi ko ek community festival ki tarah present karne lage aur unhone Ganpati Visarjan ka idea bhi logon mein spread kiya. Unke efforts ki wajah se aur logon ke mann mein Ganesh ji ki aastha ke wajah se Vinayaka Chaturthi ki popularity kaafi zyada badhne lagi aur jald hi ye festival ek community festival mein transform ho gaya.

Vinayaka Chaturthi | Vinayaka Chavithi | Modern India ka ek cultural symbol

Vinayaka Chaturthi ko celebrate karne ke tarike pichle kuch decades aur centuries mein kaafi change hue hain lekin 21st century mein Vinayaka Chaturthi sirf ek festival nahi balki India ke culture ka ek representative ban gaya hai. Puri duniya mein Vinayaka Chaturthi celebrations ko Indian cultural practices ka ek misaal mana jata hai. Ye baat alag hai ki Vinayaka Chaturthi sirf India mein nahi balki Nepal, Thailand, Cambodia aur Afghanistan jaise baaki deshon mein bhi manaya jaata hai. Vinayaka Chaturthi ke popularity ek recent example isme dekha jaa sakta hai ki Hollywood ke popular directors The Wachowski twins dwara direct kiye gaye TV series Sense8 mein bhi Vinayaka Chaturthi aur Ganesh ji ko kaafi ache se represent kiya gaya hai.

Vinayaka Chaturthi India ke bahar rehne wale Bharatiya logon ko saath lane ka bhi ek acha mauka hai. Vinayaka Chaturthi ke celebrations bade scale pe America aur Europe ke kuch bhaagon mein bhi kiya jaate hain. For example, France mein Vinayaka Chaturthi ke street pe bhi celebrations hote hain. In celebrations ki khatir, wahan rehne wale local groups Ganesh ji ki murtiyon ko India se specially import bhi karvate hain.

 

Siddhivinayak Temple Mumbai

Siddhivinayak Temple, Mumbai- Image Source: Wikipedia

Apne desh mein, Ganesh ji ke jo popular temples hain – jaise Mumbai ka Siddhivinayak Temple, Pune ka Shrimant Dagdusheth Halwai Ganpati Temple aur Chitoor ka Kanipakam Vinayaka Temple – wo Vinayaka Chaturthi ke time pe hazaaron Ganesh ji ke bhakton se bhare hue rehte hain. India ke commercial commercial capital Mumbai mein bade se bade pandal lagte hain jinhe aksar Bollywood ke leading actors aur Indian companies ke top business leaders bhi visit karte hain. In bade pandalo mein se Lalbaugcha Raja aur GSB Seva Mandal Ganpati sabe popular pandol mein se kuch naam hain.

Dagdusheth Halwai Temple Pune- Ganesh Idol

Dagdusheth Halwai Temple, Pune- Ganesh Idol

Sabse badi baat to ye hai, ki Mumbai sheher, jo usually economic activity se busy rehta hai wo Vinayaka Chaturthi ke aakhri din saara kaam rok kar, Ganesh ji ki puja mein magn ho jaata hai. Mumbai mein Ganpati Visarjan ke din laakhon log road pe Ganesh ji ki processions mein hissa lete hue Arabian Sea ki taraf badhte hain. Mumbai police, Ganpati Visarjan ke liye hafton pehle se security arrangements karne lagti hain ye ensure karne ke liye ki ye saare celebrations bina kisi problems ke conclude ho sakein.

Vinayaka Chaturthi | Vinayaka Chavithi |Story – Chandrama ko diya gaya Ganesh ji ka shraap

Vinayaka Chaturthi se related ek popular myth ye hai ki us festival ke samay kisi ko bhi Chandrama ko nahi dekhna chahiye. Bhakton ka ye maan na hai ki agar Ganesh ji ke janam din pe koi galti se bhi chandrama ko dekh le, to us insaan ko jhoothe kalankon ka saamna karna padega.

Is vishwas ke peeche ki kahani kuch aisi hai. Mana jaata hai ki ek din Ganesh ji ke bhakt Raja Kubera ne Ganesh ji ko unke janam din ke mauke pe ek daawat pe invite kiya tha. Is invitation ko accept kate hue, Ganesh ji apne vahana Mooshak pe sawaar hoke Raja Kubera ke ghar nikle. Wahan pe Ganesh ji ne pet aur mann bhar ke mithaiyon aur alag alag dishes khaya aur phir wo wapas ghar chale. Ghar jaate samay, unke vahan Mooshak ke saamne achanak se ek saanp aa gaya aur usko dekhte hi Mooshak ghabrate hue ruk gaya. Is ghabrahat mein, galti se Mooshak ne Ganesh ji ko neeche gira diya.

Neeche girne pe, Ganesj ka pet fat gaya aur unhone job hi khana Raja Kubera ke ghar khaya tha, wo sab unke pet se bahar gir gaya. Ye accidence dekh ke, aakash mein chamakta hua Chandrama hasne laga aur uske Ganesh ji ki khilli udayi. Chandrama Ganesh ji ke appearance ki mazaak udane laga aur wo ye tak keh gaya ki Ganesh ji kabhi bhi uski chamak aur beauty ko match nahi kar payenge.

Chandrama ki baatein sunke Ganesh ji gussa gaye. Sabse pehle unhone ne apne pet se gire hue saare khane to wapas apne pet mein daala. Uske baad, unhone us saanp ko pakda jiski wajah se Mooshak apne raste mein dagamaga gaya tha aur unhone us saanp ko apne pet pe baandh liya taaki unka pet wapas na fate. Fir unhone, krodh se Chandrama ki taraf dekha aur apne haanth se ek daant tod kar Chandrama ki taraf fek diya.

Is chot ki waje se, Chandrama rone laga. Is samay par Ganesh ji ko Chandrama ko remind kiya ki uski to bhi sundarta thi wo sift Suraj ki roshni ki wajah se thi. Fir, Ganesh ji ne Chandrama ko shrap diya ki wo ab se hamesha ke liye Dharti ke shadow mein rahega aur Suraj ki roshni naa milne ke kaaran koi bhi use aakash mein nahi dekh payega.

Is shraap se Chandrama kaafi darr gaya aur wo Ganesh ji se maafi mangne laga lekin Ganesh ji ne inkaar kar diya. Iske kuch dino baad, Chandrama ke saath saath baaki Devon ne bhi Ganesh ji re request kiya ki wo apna shraap wapas le lein, kyunki Chandrama ke bina raat mein Dharti ke paas roshni ka koi aur source nahi tha. Kaafi time ke baad, jab Ganesh ji ka gussa thanda ho gaya, wo Devon ki baat maan gaye lekin unhone pura shraap wapas nahi liya.

Ganesh ji ne declare kiya ki Chandrama hamesha ke liye andhere mein nahi rahega lekin wo saara jeevan wo roshni aur andhere ke beech mein ghumte rahega. Iski waje se Chandrama ko ye hamesha yaad rahega ki uski sundarta permanent nahi balki temporary hai. Iske upar Ganesh ji ne ye bhi bola ki agar unke birthday pe kisi ne bhi Chandrama ki taraf dekha, to unka Chandrama ko diya gaya shraap uspe bhi lag jayega aur uski wajah se log uspe jhoothe aarop lagane lagenge. Is kahani ke waje se, Ganesh ji ke bhakt ye maante hain ki unke janamdin, yaani Vinayaka Chaturthi ke din, Chandrama ko nahi dekhna chahiye.

Ganesh ji ke ek dant hone ke peeche kaafi kahaniya hain. Aur is kahani ko bhi un kahaniyon mein se ek maana jaata hai. Is kahani ka Bhagwan Krishna se bhi ek naata hai. Ye maana jaata hai ki Bhagwan Krishna ne apne manav avatar ke roop mein Vinayaka Chaturthi ke din galati se Chandrama ko dekh liya tha aur iske kaaran Bhagwan Krishna pe Syamantakamani churane ka aarop laga tha. Kaafi mushkil ke baad, Bhagwan Krishna ne us aarop ko galat prove kiya aur uske baad unhone pure manav jaati ko ye vardaan diya ki jo bhi insaan Syamantakamani ki kahani sun le, uspe Chandrama ke shraap ka koi asar nahi hoga.

(Is there something more you want to know about Ganesh Chaturthi? Can’t find it on VedSutra? Write to us at vedsutra[at]gmail.com with inputs and we will try to do our best to make our database more exhaustive)

Join us on Whatsapp

and get free images of Ganesh, Shiva, Durga, Krishna and other gods weekly.

You may also like...

Leave a Reply

Your email address will not be published. Required fields are marked *